Storie dai rapuarts
Cualchi curiositât us pues jessi vignude sui rapuarts intai agns passâts cul Ateneu udinês.
Al covente, duncje, tornâ indaûr un moment par capî miôr la situazion.
I agns 1967 - 1978
Il strument juridic aministratîf adotât une volte (tal 1967) dai Ents locâi par inviâ e puartâ indevant la azion indreçade a furnî Udin e il Friûl di une sede universitarie, tal principi in convenzion cu la Universitât dai studis di Triest, ma cul intindiment declarât di rivâ a une Universitât dai studis a Udin autonome (obietîf dut câs no permetût de normative di chê volte) e, duncje, di inlidrisâle a fuart tal teritori, al fo il "consorzi di ents locâi", daûr dal art. 156 e seguitîfs dal Test Unic de Leç Comunâl e Provinciâl dai 3 di Març dal 1934 n. 383, che al jere in vore in chê volte. Cun Decret dal Prefet de Provincie di Udin dai 27 di Novembar dal 1967, al jere costituît il "Consorzi pe costituzion e il disvilup dai insegnaments universitaris".
Il model istituzionâl di riferiment cjapât tant che fonde al jere stât il corispondent "Consorzi pe costituzion e il disvilup dai studis universitaris" di Verone (costituît tal 1959), che cu la sô azion e jere za stade vierte la Libare Universitât di Verone, cun cors che però no jerin stâts ricognossûts dal Ministeri competent: si scugnî in chê volte, cuntun cicli didatic rivât insom, tornâ indaûr, tal interès dai students, al unic strument juridic che in chê volte si podeve ameti, ven a stâi la convenzion cuntune universitât statâl, in chel câs la Universitât di Padue.
Une volte costituît, il Consorzi al leve indevant daurman - intun contest politic regjonâl no dal dut favorevul (jessint inmò vivis lis polemichis a rivuart sedi de ubicazion a Triest dal cjâf lûc regjonâl tal 1962, sedi de istituzion a Triest de Facoltât di Medisine (tal 1964), za reclamade di Udin e dal Friûl) - a definî cu la Universitât dai studis di Triest i contignûts de convenzion trentenâl, firmade ai 29 di Fevrâr dal 1968: e veve tant che fin chel di inviâ a Udin la facoltât di lenghis e leteraturis forestis (che no esisteve in chel Ateneu) e di sostignîndi il funzionament.
Daûr di chest document, cul Decret dal President de Republiche dai 12 di Jugn dal 1968 n. 1170, e vignive metude in vore, te Universitât dai studis di Triest, la "facoltât di lenghis e leteraturis forestis cun sede a Udin", fissant il tacâ dai cors tal an academic 1968/69.
I contignûts de convenzion, pardabon onerôs – parcè che la Universitât dai studis di Triest (diferent de Universitât dai studis di Padue che te sede di Verone e jere intervignude in mût responsabil cun risorsis pe edilizie, finanziaments e so personâl) e veve sclarît ben il so intindiment di no destinâ nissune risorse sô a Udin – a poiavin ducj i oblics tant che cjame sul Consorzi, cjapant dentri il personâl che, a Triest, te Aministrazion Centrâl de Universitât, al veve di proviodi ae aministrazion de facoltât convenzionade, cu la gjestion di un belanç separât di chel gjenerâl de Universitât di Triest.
Devant di chescj contignûts de convenzion, cun mieçs siei e cun risorsis di divignince regjonâl (dut câs rispietant il salt principi che in ogni câs lis risorsis regjonâls destinadis ae Universitât dai studis di Triest a vessin di jessi simpri e in ogni câs plui grandis di chês destinadis pal titul corispondent a Udin) il Consorzi al sigurave dutis lis sôs obligazions, intindint ancje chês di caratar edilizi, cul comprâ e daspò ristruturâ Palaç Antonins-Cernazai e po l’ex Convent dai Agostinians (plui cognossût tant che ex Intendence di finance), cul comprâ ducj i furniments e imprescj che a coventavin e la assunzion dal personâl che al coventave par fâ funzionâ la facoltât decentrade.
Daspò e vignive stipulade tal Jugn dal 1972, tra la Universitât dai studis di Triest e il Consorzi, la convenzion par meti in vore a Udin i cors dal bieni dopleât de Facoltât di Inzegnerie, vierzint i cors tal an academic 1972/73. Ancje la convenzion di Inzegnerie e cjamave ducj i oblics sul Consorzi, sedi par cuvierzi i coscj de docence e dal funzionament (di gjestî cun belanç separât dal belanç gjenerâl de Universitât di Triest), sedi pes componentis struturâls e infrastruturâls e pal personâl, che il Consorzi al veve di sigurâ in mût diret, obligazions ancje chestis siguradis ad in plen.
I agns 1977-1981
Cun leç dai 8 di Avost dal 1977, n. 546, articul 26, il Parlament al disponeve, tra chês altris robis, la istituzion tacant dal an academic 1977-78 de Universitât dai studis di Udin, cun cors di lauree che si veve di metiju in vore tacant dal an academic 1978-79. Tal an daspò, al rivave, lant daûr ae deleghe dade al Guvier cul citât articul 26, il DPR dai 6 di Març dal 1978 n. 102, li che si cjatave une formalizazion juridiche des disposizions su la Universitât dai studis di Udin.
Par chel che al rivuarde in mût specific il Consorzi, la leç e chest decret a disponevin "il mantigniment in pro de Universitât dai studis di Udin de concession in ûs gratuit e de destinazion di ûs dai imobii di proprietât, e ancje il restâ fers i oblics cjapâts sù dal Consorzi viers di chê ".
In relazion cui contignûts dal art. 8 dal citât DPR al jere po stipulât, ai 18 di Dicembar dal 1980, tra la Universitât dai studis di Udin e il Consorzi pe costituzion e il disvilup dai insegnaments universitaris, un specific at di ricognizion che, su la fonde di chel, a vignivin trasferîts ae Universitât di gnove costituzion i rapuarts in convenzion che prime a jerin metûts in vore cu la Universitât dai studis di Triest, fin ae scjadince naturâl de convenzion origjinarie. E vignive po stipulade tra lis parts ai 6.2.1981 une seconde convenzion (fate buine cun DPR 673/81), cuntune durade di vincj agns, li che si definive un model di disvilup de Universitât di Udin di realizâ mediant di une colaborazion direte tra i doi ents (Universitât e Consorzi).
I agns 1981/1998
In plui dai intervents edilizis, de acuisizion di furniments e imprescj e de assunzion dal personâl sore riclamâts pai agns che a van fintremai al 1978, par ricuardâju a vegnin ca sot ripuartâts i numars dai intervents sigurâts in pro de Universitât dai studis di Udin (prime dal Consorzi pe costituzion e disvilup dai insegnaments universitaris e daspò, ae fin di chest, dal Consorzi universitari dal Friûl) in mût diret, rispietant il rapuart de convenzion e jessint in vore chest fin ai 31.12.97:
Lûs e riscjaldament dai Palaç Antonins-Cernazai (art. 8 dal DPR 102/78)
L. 2.075.218.582
(L. 3.198.332.043 in liris corintis)
Meti a disposizion i Palaçs Antonins-Cernazai e l’ex convent di vie Mantica (art. 8 - art. 9 dal DPR 102/78)
(Liris 2.402.664.000 - cost figuratîf in liris corintis)
Intervents direts daûr de domande de Universitât L.1.431.584.424 (art. 9 dal DPR 102/78)
(L. 3.107.636.752 in liris corintis)
Intervents di manutenzion straordenarie
L. 177.270.638
(L. 192.194.227 in liris corintis)
Totâl L.8.252.737.644
(L. 11.926.844.222 in liris corintis)
Te date dai 28.2.1998 (scjadince naturâl de convenzion trentenâl, e daûr dai contignûts dal at di ricognizion dal 1980), il Consorzi al à proviodût a trasferî al Ateneu dut il patrimoni in imprescj e furniments destinâts une volte par coventâ ae Facoltât di Lenghis e leteraturis forestis e al bieni propedeutic di Inzegnerie, doprâts in mût corint de Universitât fintremai de sô costituzion.