Tamau

Il paîs di Tamau -Tischlbong al è logât a 832 metris s.n.m. tal Cjanâl di S. Pieri, in Cjargne, da pît de maestose parêt de Crete di Tamau. Al è dividût in cuatri borcs, Cjasâi de Siee, Scholeit, Pauarn e Braide metûts dilunc vie di dôs stradis: chê antighe, dentri vie, la che ad ôr di jê a son plui cjasis, chê altre, la statâl 52bis, che e cor plui par fûr e e puarte al Pas di Mont di Crôs li dongje, che al segne il confin tra Italie e Austrie. La statâl e je une strade che e à un grant passaç, soredut vie pal Istât, cuant che i passin sore i turiscj che a vegnin de Europe dal Nord. Pe valade e cor la Bût, flum nudrît in buine part cu lis aghis dal maraveôs Fontanon.

A Tamau si fevele une lenghe antighe imparintade a strent cul todesc. Lis sôs origjins a tornin indaûr al an Mil, cuant che int che e vignive de Austrie vicine si stabilì dongje dal riu dal Fontanon. Daûr de tradizion in cheste zone a sotentrarin dôs colonizazions di minadôrs che a vignivin une de valade carinziane de Gail e chê altre de val ator dal Weissensee. A son dal 1342 e dal 1375 i prins documents scrits che a ripuartin il non di Tamau te forme todescje Teschilbang e Teschelwanch. Il disvilup de ativitât minerarie tai agns daspò al riclamà tal paîs altris lavorents. Tal XVIII secul Tamau al fo fiscât di une inondazion violente. I tignirin daûr une vore di agns di emigrazion. Cul sclopâ de Prime Vuere Mondiâl une vore di emigrants a tornarin tal paîs. Ae fin de Seconde vuere mondiâl part de popolazion e scugnì emigrâ une altre volte par mutîfs economics.

In dì di vuê Tamau al è un paîs di 450 abitants: o invidìn ducj a visitâlu sedi mediant dai nestris sîts internet www.taicinvriaul.org e www.timau.com che di persone.

Cemût rivâi

Di Udin e Tarvis: autostrade A23 Palme - Tarvis, jessude al casel di Cjargne, strade statâl 52 fin a Tumieç. Di Tumieç strade statâl 52 bis te direzion dal Pas di Mont di Crôs par cirche 25 km. Di Lienz ss 100 fin a Oberdrauburg po ss 110 fin a Kötschach Mauthen e Pas di Mont di Crôs.