Sauris
La comunitât di Sauris/Zahre (1000-1400 m.s.n.m.; 400 abitants; 3 frazions) e vîf te alte val dal Lumiei, sul ôr nord ocidentâl de provincie di Udin. In cheste concje verde, circondade des monts, si insedià, dongje de metât dal secul XIII, un grup di fameis di contadins e arlevadôrs, che a vignivin de zone che cumò e je sul confin tra la Carinzie e il Tirol. Il prin document, che al è dal 1280, e chei daspò, des primis desenis di agns dal ‘300, a testemoniin une comunitât distribuide tai doi paîs di Sauris Disot (Dörf) e Sauris Disore (Plotsn), e a chescj si zontin daspò i borcs di Lateis (Latais), La Maine (Ame Lataise) e Velt. Dilunc dai secui i abitants a sviluparin une economie fondade sul ecuilibri delicât cu lis risorsis dal teritori, integrant lis ativitâts tradizionâls dal agropastoralisim alpin cul sfrutament dai boscs e, tai secui plui resints, cu la emigrazion stagjonâl masculine.
De zone di origjin, dut câs, i Saurans a conservarin cetantis carateristichis culturâls, scomençant de lenghe, che e parten al grup bavarês meridionâl dal alt todesc. Di une bande e à conservât plui caratars dal todesc arcaic, di chê altre si è evolude, cjapant sù e adatant elements di chês altris lenghis. Par chestis particolaritâts il sauran al è di doi secui materie di interès pai studiôs talians e forescj. La analisi linguistiche, e à permetût di integrâ lis scjarsis fonts storichis par fâ lûs su lis origjins de comunitât, in gracie des analogjiis riscontradis cui dialets carinzians e tirolês, che a partegnin ae stesse çocje.
Fin ae metât dal secul XIX il sauran al à vût dome une tradizion orâl. Dongje dal 1850 Bons. Giorgio Plozzer, plevan di Sauris, al elaborà une traduzion dal catechisim latin, par doprâlu cui fruts dal puest, che a fevelavin dome par sauran. Te seconde metât dal secul e tal secul daspò altris autôrs a àn componût lirichis tal idiome locâl e in dì di vuê Sauris al pues svantâ une produzion poetiche impuartante par une comunitât cussì piçule. Aes poesiis al va zontât il ric patrimoni des preieris e dai “cjants de stele” (Stearnliedlan), cualchidun di chescj al va indaûr fin tal secul XVI e al è eseguît fin tai nestris agns sot Nadâl. Di plui di trente agns al ven cun di plui publicât un boletin parochiâl, "De Zahre reidet" (Sauris al fevele), là che si cjatin dispès articui in lenghe locâl.
Daûr di stimis resintis, il sauran al è fevelât ancjemò dal 70% de popolazion residente, che lu dopre in famee, ma ancje tai lûcs publics e tai ambients di vore. I toponims a son pal plui in lenghe saurane e a son centrâi par cualchi progjet de Aministrazion comunâl pe lôr conservazion e valorizazion.
Tal 1990 la lenghe e la culture locâls a forin introdusudis te scuele elementâr di Sauris, sot forme di ativitâts facoltativis. Tal an scolastic 1996/97 l'insegnament al è deventât obligatori, sei pai students des elementârs che par chei des maternis. Tai ultins agns scolastics, dut câs, la percentuâl orarie e je stade ridusude a fuart.
In plui de lenghe, lis tradizions de maripatrie si son conservadis ancje in altris cjamps de culture materiâl e simboliche, par esempli tes tipologjiis architetonichis, tal conservâ e preparâ la robe di mangjâ, tal lavôr dai cjamps, te devozion a S. Svualt (difondude in mût particolâr tai paîs di lenghe todescje), tai rituâi leâts aes fiestis di Nadâl e dal Carnevâl.
Tes ultimis desenis di agns il Comun e lis diviersis associazions (la Corâl "Zahre", il Circul Culturâl Sauran "Fulgenzio Schneider", la Associazion Turistiche "Pro Sauris") si son spindûts par mantignî in vite e fâ cognossi lis peculiaritâts culturâls e linguistichis de valade, peculiaritâts che a somein simpri plui in pericul di estinzion, ancje pes piçulis dimensions de comunitât.